لوطلع العيب .. من أهل العيب .. مايبقاش عيب !!!

آخر مقالاتى بجريدة ( المصرى اليوم ) نشرت الأربعاء 1 مايو 2008
يارب تعجبكم !! قولولى رأيكم .. أدام الله عزكم ...
************************

لو طلع العيب من أهل العيب .. مايبقاش عيب !!!
ـــــــــــــــــــــــــــــــــــــــــــــــــــــــــــــــــــــــــــــــــــــ

• عيب ... إن النايل سات تتنازل عن 945 ألف دولار دون مبرر، لبعض القنوات الفضائية من مستأجرى النايل سات ( حسب تقرير الجهاز المركزى للمحاسبات ) ، إلا إذا كانت مكافأة لهذه القنوات فى تفوقها وريادتها على القنوات المصرية ..!!

• عيب ... إن مصر تبيع الغاز لكل العالم بسعر يقل عن التكلفة الفعلية بـ 50% ... لكن اللى مش عيب إن الحكومة لديها هدف نبيل من ذلك !! وهو التخلص من كل الغاز المصرى بأى سعر .. علشان تحافظ على حياة المصريين اللى بيموتوا بالغاز وهما بيستحموا !!

• عيب .... قرار أشرف زكى – نقيب الممثلين – بتحديد عمل العرب فى الأعمال الفنية المصرية .. لأن ده ببساطة شديدة تنازل بكامل إرادتنا عن ريادة مصر للفنون ..

• عيب قوى ... شكل العلم المصرى أعلى المبانى الحكومية والوزارات .. فحاله من حال المواطن المصرى .. والأثنين شكلهم يقطع القلب !!

• عيب ... على أمريكا وهى الدولة الكبرى ..إنها لغاية دلوقت بتستعين بخبيراتنا من الراقصات الشرقيات لإلقاء محاضرات عن الرقص الشرقى ... فهاهى الأستاذة / فيفى عبده تلقى محاضراتها للعام الثانى على التوالى .. وستلحق بها الأستاذة / دينا فى يوليو القادم ... فألف حمد وشكر لك يارب أننا مازلنا نتمتع بالريادة فى بعض المجالات !!

• عيب قوى قوى ... أن مرشد الأخوان المسلمين ( المحظورة ) بتاع ( طظ فى مصر والمصريين ) فاكرينه ؟؟.. آهو بعد مابلعنا له كلامه البايخ عن المصريين وإهانته لهم بطظ الشهيرة .. هاهو يواصل الكلام الخارج عن حدود اللياقة .. فى تعليقه على أحكام القضاء المصرى بإدانة 25 متهما من جماعته قائلا بالنص " ماجرى فى المحكمة العسكرية جريمة مكتملة الأركان للنظام .. ولن تجد أحدا من القضاة الذين حكموا على الشرفاء من الأخوان يسير فى الشارع .. لأنه لو فعل سيبصق عليه كل المصريين " بالذمة شفتم ألفاظ مهذبة أكثر من كده .. فى الأول ( طظ فى مصر والمصريين .. وفى الآخر عايز يغرق القضاة ببصاق المصريين !! ) فنعم القدوة أنت أيها المرشد العظيم !!

• عيب قوى .. إشتراك جماعة الأخوان المحظورة مع حماس فى التخطيط لقتل بعض كوادر فتح والمنشقين عن حماس من المقيمين بمصر .. ولو عايزين تصفوا خلافاتكم بطريقتكم الدموية المعروفة !! فهذا شىء يسعدنا .. بس أمانة عليكم صفوا خلافاتكم دى بعيد عن مصر المحروسة !!


• عيب قوى ... أن يتم التكتيم والتعتيم على قانون مكافحة الأرهاب الجديد .. والذى لم يعرض على مجلس الشعب بعد .. علما أنه من المفترض إنتهاء العمل بقانون الطوارىء الحالى فى آخر مايو 2008 .. ولكن من خبرتنا فى التعامل مع الحزب الوطنى وحكومته أؤكد لكم أنه سيتم عرض قانون الأرهاب على مجلس الشعب فى النصف الأخير من شهر مايو .. لتتم الموافقة عليه بسرعة شديدة .. وننام ونقوم نلاقى القانون تم إقراره من سيد قراره .. وسلملى على الأغلبية !!!

• عيب .,. إننا ماناخدش عبرة من شعب دمياط .. ويكون لكل المصريين العبرة والمثل فى كل نواحى حياتنا السعيدة !!!

• عيب .. ياإسراء عبد الفتاح تراجعك وشعورك بالإنهزام سريعا .. فقد أصبحت قدوة حسنة للشباب والشابات .. بعد أن فقدوا القدوات الحسنة من سنين .. وأقول لك ( الضربة اللى على الضهر .. لو ماكسرتوش .. بتقويه ) .

• عيب .. إن أعضاء الكونجرس الأمريكى يهددون بعرقلة صفقات الأسلحة لدول الأوبك .. لإجبارهم على زيادة إنتاج النفط .. وبالتالى خفض سعره !! فى الوقت اللى أعضاء الكونجرس دول عارفين تماما أن دول الأوبك العربية بتشترى الأسلحة من الدول الكبرى غصب عنها !!.. وماهى إلا مشاركة من الشعوب العربية بالتقليل من البطالة فى الدول الكبرى .. لكن الأسلحة اللى تم شراؤها موجودة بالحفظ والصون فى مخازن جيوشنا العربية !!.. وهى للمنظرة والفشخرة فقط .. لأن مافيش حد من العرب حايحارب أو ناوى يحارب .. وكمان مافيش ولا واحد من الجيوش دى يعرف يستخدم الأسلحة دى .. وأرجعوا الى تقارير البنتاجون السنوية عن الأسلحة المصدرة للدول العربية !!

• عيب قوى ... موعد المعارضات الكثيرة جدا من نواب الشعب والصحفيين والأعلاميين عن تقديم وتأخير الساعة .. لأن هذه المعارضات لايتم نشرها أو الحديث عنها إلا قبل تغيير الساعة بيومين تلاته .. أو بعد تغييرها بيومين تلاته .. والحكاية دى بتتكرر بلا مبالغة منذ أكثر من ثلاثين عاما .. عجبى !!